ഹദീസ് : 14
عَنْ أَبِي هُرَيْرَةَ، أَنَّ رَسُولَ اللهِ صَلَّى اللَّهُ عَلَيْهِ وَسَلَّمَ، قَالَ: أَتَدْرُونَ مَا الْغِيبَةُ؟ قَالُوا: اللَّهُ وَرَسُولُهُ أَعْلَمُ، قَالَ: ذِكْرُكَ أَخَاكَ بِمَا يَكْرَهُ، قِيلَ أَفَرَأَيْتَ إِنْ كَانَ فِي أَخِي مَا أَقُولُ ؟ قَالَ: إِنْ كَانَ فِيهِ مَا تَقُولُ، فَقَدِ اغْتَبْتَهُ، وَإِنْ لَمْ يَكُنْ فِيهِ فَقَدْ بَهَتَّهُ.- صحيح مسلم
അബൂ ഹുറൈറ (റ) നിവേദനം. റസൂൽ ﷺ പറഞ്ഞു: ഏഷണി എന്നാൽ എന്താണെന്ന് നിങ്ങൾക്കറിയുമോ? അവർ പറഞ്ഞു: അല്ലാഹുവിനും റസൂലിനുമാണ് കൂടുതൽ അറിയുക. റസൂൽ ﷺ പറഞ്ഞു: നിന്റെ സഹോദരൻ വെറുക്കുന്നതായ ഒരു കാര്യം അവനെ പറ്റി പറയലാണത്. ഞാൻ പറയുന്നത് എന്റെ സഹോദരനിൽ ഉണ്ടെങ്കിൽ താങ്കൾ എന്ത് പറയുന്നു എന്ന് ചോദിക്കപ്പെട്ടു. റസൂൽ ﷺ പറഞ്ഞു: നീ പറയുന്നത് അവനിൽ ഉണ്ടെങ്കിൽ താങ്കൾ അവനെ ഏഷണി പറഞ്ഞിരിക്കുന്നു, ഇനി അത് അവനിൽ ഇല്ലെങ്കിൽ നീ അവനെ കുറിച്ച് ആരോപണം പറഞ്ഞിരിക്കുന്നു. (മുസ്‌ലിം).
വിവരണം
> ഏഷണി പറയൽ നിഷിദ്ധമാണ്. അത് വലിയ പാപവും വ്യക്തിയിലും സമൂഹത്തിലും ധാരാളം അനന്തരഫലങ്ങൾ ഉണ്ടാക്കുന്നതുമായ വിപത്താണ്.
> നിങ്ങൾ ഏഷണി പറയരുതെന്ന് അല്ലാഹു പറഞ്ഞിട്ടുണ്ട്:
يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ إِنَّ بَعْضَ الظَّنِّ إِثْمٌ ۖ وَلَا تَجَسَّسُوا وَلَا يَغْتَب بَّعْضُكُم بَعْضًا ۚ أَيُحِبُّ أَحَدُكُمْ أَن يَأْكُلَ لَحْمَ أَخِيهِ مَيْتًا فَكَرِهْتُمُوهُ ۚ وَاتَّقُوا اللَّهَ ۚ إِنَّ اللَّهَ تَوَّابٌ رَّحِيمٌ
നിങ്ങളിൽ ചിലർ ചിലരെപ്പറ്റി അവരുടെ അഭാവത്തിൽ ദുഷിച്ചു പറയുകയും അരുത്. (ഹുജുറാത്ത്:12)
ഏഷണി മൂന്ന് വിധമുണ്ട്:
1- ഒരാളിൽ ഉള്ള കാര്യം പറയൽ
2- അയാളിലില്ലാത്ത കാര്യം പറയൽ, അത് കളവ് കെട്ടിച്ചമക്കലാണ്.
3- ആരെങ്കിലും പറഞ്ഞ കാര്യം പ്രചരിപ്പിക്കൽ
> വിവിധ വിഷയങ്ങളിൽ ഏഷണി സംഭവിക്കാനിടയുണ്ട്. മതം, സ്വഭാവം, ശരീരം, സമ്പത്ത്, മക്കൾ, മാതാപിതാക്കൾ, തറവാട്, ഭാര്യ, ഭർത്താവ് തുടങ്ങിയ കാര്യങ്ങളുമായി ബന്ധപ്പെട്ടെല്ലാം ഏഷണി സംഭവിക്കാം. അത് വാക്കിലൂടെയും, ഭാവ പ്രകടനത്തിലൂടെയും, ഗോഷ്ടി കാണിക്കുന്നതിലൂടെയും, ആംഗ്യത്തിലൂടെയും, എഴുത്തിലൂടെയും എല്ലാം സംഭവിക്കാം.
> സോഷ്യൽ മീഡിയ ഉപയോഗിക്കുമ്പോൾ ഇതിൽ പെടാൻ സാധ്യത കൂടുതലാണ്.
> ഇതിന്റെ കാരണങ്ങൾ:
1- വിശ്വാസ ദുർബലത
2- തിന്മ ചെയ്യുന്നവരോടൊത്തുള്ള സഹവാസം
3- അസൂയ
4- ദുൻയാവിനോടുള്ള ഇഷ്ടം
5- ഒഴിവ് സമയം കിട്ടൽ
> ചില സന്ദർഭങ്ങളിൽ ഇത് ഏഷണി ആവില്ല:അവ:-
1- അക്രമത്തെ പറ്റിയും മറ്റും വിധികർത്താക്കളെ മുന്നിൽ അവതരിപ്പിക്കൽ.
2- മതത്തിൽ ബിദ്അത്ത് ചെയ്യുന്നത് തുറന്ന് കാട്ടൽ
3- ചില മതവിധി തേടുമ്പോൾ മറ്റുള്ളവരെ കുറിച്ച് പറയൽ അനിവാര്യമാണെങ്കിൽ പറയാം.
4- വിവാഹന്വേഷണം നടത്തുമ്പോൾ വ്യക്തിയെ കുറിച്ച് യഥാർത്ഥ രൂപത്തിൽ പറയാം.
> ഏഷണി പറയുന്നവന് ദുൻയാവിലും, ക്വബ്‌റിലും, അന്ത്യ ദിനത്തിലും, പരലോകത്തും ശിക്ഷകൾ അനുഭവിക്കേണ്ടി വരും.
> ഏഷണിക്കുള്ള ചികിത്സ:
1- തക്വ്‌വ
2- സ്വന്തം ന്യനതകളിൽ വ്യാപൃതമാവൽ, അതിനെ കുറിച്ച് ബോധമുള്ള വനാകൽ
3- ആത്മ വിചാരണ ചെയ്യൽ
4- അല്ലാഹുവിനെ ഓർക്കൽ പതിവാക്കൽ
5- നല്ലവരോടൊത്ത് സഹവസിക്കൽ
> ഏഷണി പറഞ്ഞു പോയാൽ അതിനുള്ള പ്രായശ്ചിത്തം:
1- ആരെക്കുറിച്ച് ഏഷണി പറഞ്ഞുവോ അവരോട് അത് പറഞ്ഞ് മാപ്പ് ചോദിക്കൽ.
2- അതിന് സാധിച്ചില്ലെങ്കിൽ അവർക്ക് വേണ്ടി നൻമക്കായി പ്രാർത്ഥിക്കൽ
3- അല്ലാഹുവിനോട് തൗബ തേടൽ.
