വീട്ടിലിരിക്കാം വിഭവങ്ങളൊരുക്കാം. (പാഠം – ഒന്ന്)

ഒരു വലിയ പരീക്ഷണ ഘട്ടത്തിലൂടെയാണ് നാം കടന്നു പൊയ്ക്കൊണ്ടിരിക്കുന്നത്. എല്ലാവരും വീട്ടിലാണ്. ഈ ഒഴിവുസമയം നമുക്ക് ഉപയോഗപ്പെടുത്തേണ്ടേ? വേണം. എങ്ങിനെയത് സാധ്യമാകും ? കൃത്യമായ പ്ലാനിങ്ങുകളും അജണ്ടകളും
വേണം. വരൂ! നമുക്ക് ഓരോ ദിനങ്ങളിലും ഇത്തിരി കാര്യങ്ങൾ പഠിക്കാം. പരലോകത്തേക്ക് ചില വിഭവങ്ങളൊരുക്കാം.
പഠിക്കുന്നത് പ്രവർത്തിക്കാൻ കൂടിയാണ് എന്ന് നമുക്കറിയാമല്ലോ?

ആഫിയത്ത് എന്നതാണ് ഇന്നത്തെ വിഷയം.

സമ്പൂർണ്ണ ആരോഗ്യം (الصحة التامة) എന്നതാണ് ഭാഷയിൽ അതിന്റെ അർഥം. എന്നാൽ മതപരമായി നോക്കുമ്പോൾ കുറച്ചു കൂടി വിശാലമായ അർഥമാണതിനുള്ളത്. ഒരടിമക്കുള്ള അല്ലാഹുവിന്റെ സംരക്ഷണം (دفاع الله عن العبد) എന്നാണ് പണ്ഡിതന്മാർ അതിന് നൽകിയ വിശദീകരണം. (തുഹ്ഫതുൽ അഹ് വദി) അല്ലാഹുവിന്റെ സംരക്ഷണം ആവശ്യമില്ലാത്തവരാരാണ്? ആരുമില്ല! എല്ലാവരും അവന്റെ
കാരുണ്യത്തിന് ആവശ്യക്കാരാണ്! അതിനാൽ നിത്യേന നാം അല്ലാഹുവിനോട് ആഫിയത്തിനെ ചോദിച്ചു കൊണ്ടിരിക്കണം.  നബി (സ) പറയുന്നത് കാണുക. “നിങ്ങൾ അല്ലാഹുവിനോട് ആഫിയത്ത് ചോദിക്കണം.” (ബുഖാരി-2960 )

ഇത് നമ്മോടുള്ള കൽപനയാണ്. ഇത് നാം പാലിക്കാറുണ്ടോ? ഏതു നിമിഷത്തിലും നമുക്ക് ആഫിയത്ത് ആവശ്യമാണ്. ആഫിയത്തിന്റെ വില എന്താണെന്ന് നാം ചിന്തിച്ചിട്ടുണ്ടോ? നബി തിരുമേനി (സ)യുടെ ഈ ഒരു വചനം മതി അതിന്റെ പ്രാധാന്യം ഗ്രഹിക്കാൻ.

اسألوا الله العفو والعافية.فإن أحدا لم يعط بعد اليقين خيرا من العافية.

“നിങ്ങൾ അല്ലാഹുവിനോട് പൊറുക്കലിനേയും ആഫിയത്തിനേയും തേടുക. ദൃഢ ജ്ഞാനത്തിനു ശേഷം ഒരാൾക്ക് നൽകപ്പെടുന്ന
നന്മകളിൽ ഏറ്റവും മഹത്തരം ആഫിയത്താകുന്നു.“(തിർമിദി: 3558)

നബി (സ) മിമ്പറിൽ വച്ച് കരഞ്ഞു കൊണ്ടാണ് ഈ കാര്യം പറഞ്ഞിട്ടുള്ളത് എന്നത് പ്രത്യേകം ശ്രദ്ധേയമാണ്. നോക്കൂ! നബി(സ) എന്തു മാത്രം പ്രാധാന്യമാണ് ഈ അനുഗ്രഹത്തിന് കൽപിച്ചിരുന്നത് ! അതേസമയത്ത്, നമ്മൾ ഇതിന്റെ ഗൗരവം വേണ്ടത്ര ഉൾകൊണ്ടിട്ടുണ്ടോ?
രണ്ടു സംഭവങ്ങൾ പറയാം.
നബി (സ) രോഗിയായ ഒരാളെ സന്ദർശിക്കാൻ പോയി. രോഗം അയാളെ വല്ലാതെ ക്ഷീണിപ്പിച്ചിട്ടുണ്ട്. ഒരു പക്ഷി കുഞ്ഞിനെ പോലെ മെലിഞ്ഞൊട്ടിയിരിക്കുന്നു അയാൾ! തിരുമേനി ചോദിച്ചു:  “നിങ്ങൾ റബ്ബിനോട് ആഫിയത്തിനെ ചോദിക്കാറില്ലേ ” (തിർമിദി: 3487 )

അബ്ബാസ് (റ) ഒരിക്കൽ പ്രവാചകന്റെ അടുക്കൽ വന്ന് ഇപ്രകാരം പറഞ്ഞു: “റസൂലേ !അല്ലാഹുവിനോട് ചോദിക്കാൻ എനിക്കാരു സംഗതി പഠിപ്പിച്ച് തരൂ!” നബി (സ) പറഞ്ഞു: “നിങ്ങൾ അല്ലാഹുവിനോട് ആഫിയത്തിനെ ചോദിക്കുക.”
കുറച്ച് ദിനങ്ങൾ കഴിഞ്ഞു. അബ്ബാസ് (റ) വീണ്ടും വന്നു. മുമ്പത്തെ ചോദ്യം വീണ്ടും ചോദിച്ചു. നബി (സ) മറുപടി പറഞ്ഞു:

“അല്ലാഹുവിന്റെ ദൂതരുടെ പിതൃവ്യരേ! ഇരു ലോകത്തും ആഫിയത്ത് നൽകാൻ നിങ്ങൾ അല്ലാഹുവിനേട് തേടുക.” (തിർമിദി: 3514)
ഈ രണ്ടു സംഭവങ്ങളിൽ നിന്നും ആഫിയത്തിന് നമ്മുടെ ജീവിതത്തിലുള്ള പ്രാധാന്യം വ്യക്തമായല്ലോ? അതുകൊണ്ടാണ് ഈ ഹദീസിന്റെ വിശദീകരണത്തിൽ പണ്ഡിതന്മാർ ഇങ്ങനെ പറഞ്ഞത്.
بأن الدعاء بالعافية لا يساويه شيء من الأدعية ولا يقوم مقامه شيء من الكلام الذى يدعى به ذو الجلال والاكرام
“അല്ലാഹുവിനോട് തേടപ്പെടുന്ന സംസാരത്തിൽ, ആഫിയത്തിനെ ചോദിക്കുന്നതിനോട് കിട പിടിക്കുന്നതോ അതിന്റെ സ്ഥാനത്തു നിൽക്കുന്ന തോ ആയ ഒന്നുമില്ല” (തുഹ്ഫതുൽ അഹ് വദി)

സുബ്ഹാനല്ലാഹ്! അതുകൊണ്ട് നമുക്കിനി ആഫിയത്തിനു വേണ്ടി പ്രാർത്ഥിച്ചു കൊണ്ടിരിക്കാം. പ്രവാചകൻ (സ) രാവിലെയും വൈകുന്നേരവും പതിവായി പ്രാർത്ഥിച്ച രണ്ട് പ്രാർത്ഥനകൾ നമുക്ക് പഠിക്കാം. പഠിച്ചു കഴിഞ്ഞാൽ പ്രാവർത്തികമാക്കാം.എന്നിട്ട് ഇത് മറ്റുള്ളവരിലേക്കും എത്തിക്കാം.

اللَّهُمَّ عَافِنِي فِي بَدَنِي، اللَّهُمَّ عَافِنِي فِي سَمْعِي، اللَّهُمَّ عَافِنِي فِي بَصَرِي، لَا إِلَهَ إِلَّا أَنْتَ

“അല്ലാഹുവേ! എന്റെ ശരീരത്തിനും കേൾവിക്കും കാഴ്ചക്കും നീ ആഫിയത്ത് നൽകേണമേ! നീയല്ലാതെ മറ്റൊരു ഇലാഹ് ഇല്ലതന്നെ.”

اللَّهُمَّ إِنِّي أَسْأَلُكَ الْعَفْوَ وَالْعَافِيَةَ فِي الدُّنْيَا وَالْآخِرَةِ، اللَّهُمَّ إِنِّي أَسْأَلُكَ الْعَفْوَ وَالْعَافِيَةَ فِي دِينِي وَدُنْيَايَ وَأَهْلِي وَمَالِي، اللَّهُمَّ اسْتُرْ عَوْرَاتِي، وَآمِنْ رَوْعَاتِي ، وَاحْفَظْنِي مِنْ بَيْنِ يَدَيَّ، وَمِنْ خَلْفِي، وَعَنْ يَمِينِي، وَعَنْ شِمَالِي، وَمِنْ فَوْقِي، وَأَعُوذُ بِكَ أَنْ أُغْتَالَ مِنْ تَحْتِي

അല്ലാഹുവേ! ദുനിയാവിലും പരലോകത്തിലും ഞാൻ ആഫിയത്ത് ചോദിക്കുന്നു. അല്ലാഹുവേ! എന്റെ ദീനിലും ദുനിയാവിലും കുടുബത്തിലും ധനത്തിലും പാപമോചനവും ആഫിയത്തും ഞാൻ ചോദിക്കുന്നു. എന്റെ ന്യൂനതകൾ നീ മറച്ചുവക്കേണമേ! ഭയത്തിൽ നിന്ന് നിർഭയയത്വം നൽകേണമേ! മുന്നിൽ നിന്നും പിന്നിൽ നിന്നും വലതു ഭാഗത്തു നിന്നും ഇടതു ഭാഗത്തു നിന്നും മുകളിൽ നിന്നും താഴ് ഭാഗത്ത് നിന്നും (ആണ്ട് പോവുന്നതിൽ നിന്നും ) നീ എന്നെ സംരക്ഷിക്കേണമേ!

അല്ലാഹു ഇരു ലോകത്തും ആഫിയത്ത് നൽകിനമ്മേയും കുടുംബത്തേയും അനുഗ്രഹിക്കട്ടെ! ആമീൻ.

(നന്മ മറ്റുള്ളവരിലേക്ക് എത്തിക്കൽ നന്മയാണ് )

( തുടരും –إن شاء الله)