ഹദീസ് 19

> ശുചിത്വവുമായി ബന്ധപ്പെട്ട ഹദീസ് ആണിത്. മനുഷ്യന്റെ ശുദ്ധ പ്രകൃതിയിൽ പെട്ട അഞ്ച് കാര്യങ്ങൾ ഈ ഹദീസിൽ വിശദീകരിക്കപ്പെടുന്നു. ശുദ്ധപ്രകൃതിയിൽ പെട്ട വേറെയും ചില കാര്യങ്ങൾ മറ്റു ഹദീസുകളിൽ വന്നിട്ടുണ്ട്. 

·> فِطْرَة എന്നാൽ പ്രവാചകൻമാരുടെ ചര്യ എന്നാണ് അർത്ഥമാക്കുന്നത്.

ചേലാകർമം: 

·> പുരുഷൻമാർക്ക് ഇത് വാജിബ് ആണ്. മൂത്രത്തിൽ നിന്നുള്ള പരിപൂർണ്ണ ശുചിത്വം ഉറപ്പു വരത്തുന്നതിന് ഇത് ചെയ്യൽ നിർബന്ധമാണ്. ഇസ്‌ലാമിലേക്ക് കടന്നു വരുന്നവരോട് നബി g  ചേലാ കർമം ചെയ്യാൻ കൽപിക്കാറുണ്ടായിരുന്നു. 

·> ഇത് ഈ ഉമ്മത്തിന്റെ അടയാളവും മുൻ സമുദായങ്ങളിൽ അറിയപ്പെട്ടതുമായ കാര്യമാണ്. ചെറുപ്പ കാലത്ത് ചേലാ കർമം ചെയ്യുന്നതാണ് ഉത്തമം. പ്രായപൂർത്തിയാകുമ്പോഴേക്ക് ചേലാ കർമം ചെയ്തിരിക്കണം. 

ഗുഹ്യ രോമം കളയൽ

·> اسْتِحْدَاد എന്ന് പേര് വരാൻ കാരണം ഇരുമ്പ് (حَدِيد) ഉപയോഗിച്ച് നീക്കം ചെയ്യുന്നതിനാലാണെന്ന് വിശദീകരിക്കപ്പെട്ടിട്ടുണ്ട്. 

·> ഇത് പ്രബലമായ സുന്നത്താണ്. സ്ത്രീക്കും പുരുഷനുമെല്ലാം ഇത് ബാധകമാണ്.

കക്ഷ രോമം കളയൽ

·> ഇതും സുന്നത്താണ്. കക്ഷ രോമം പറിക്കുക എന്നാണ് ഹദീസിൽ വന്നിട്ടുള്ളത്. കഴിയുന്നവർക്ക് അതാണ് നല്ലത് എന്ന് പണ്ഡിതൻമാർ വിശദീകരിച്ചിട്ടുണ്ട്. വടിച്ചു കളഞ്ഞാലും മതിയാകുന്നതാണ്, അതിന്റെ ഉദ്ദേശ്യം അഴുക്ക് നീക്കം ചെയ്യലാണ്. 

മീശ വെട്ടൽ

·> മീശയുടെ ചുണ്ടിലേക്കിറങ്ങുന്ന ഭാഗം വെട്ടൽ സുന്നത്താണ്. പലരും അശ്രദ്ധരാകുന്ന ഒരു വിഷയമാണിത്. മേൽചുണ്ട് വ്യക്തമായി കാണുന്ന വിധം മീശയുടെ അഗ്രമോ, അല്ലെങ്കിൽ മുഴുവാനായോ ചെറുതാക്കാവുന്നതാണ്. മീശ വടിക്കൽ മത നിയമമായി വന്നിട്ടില്ല. ഇമാം മാലിക് r പറഞ്ഞത് മീശ വടിക്കൽ ബിദ്അത്താണെന്നാണ്.

·> താടി വളർത്തുകയും മീശ വെട്ടുകയും വേണം എന്ന് ഹദീസുകളിൽ കാണാം. താടി വളർത്താനാണ് മതം നിർദേശിക്കുന്നത്. അത് നിർബന്ധവുമാണ്. 

നഖം വെട്ടൽ

·> നഖം വെട്ടൽ പ്രബലമായ സുന്നത്താണ്. കാലിന്റേയും കയ്യിന്റേയും നഖങ്ങൾ വെട്ടൽ ഇതിൽ ഉൾപ്പെടും. നഖം വളർത്തൽ പാടില്ലാത്ത കാര്യമാണ്. നഖം വെട്ടുന്ന കാര്യത്തിൽ ഏത് വിരലിന്റേത് ആദ്യം വെട്ടണം എന്നൊന്നും സ്ഥിരപ്പെട്ടു വന്നിട്ടില്ല എന്ന് ഇബ്‌നു ഹജർ r പറഞ്ഞിട്ടുണ്ട്.

·> ഇതിൽ പറഞ്ഞ ഗുഹ്യ രോമം കളയൽ, കക്ഷ രോമം പറിക്കൽ, മീശ വെട്ടൽ, നഖം വെട്ടൽ എന്നിവ നാൽപത് ദിവസം കൂടുമ്പോൾ ചെയ്യണം എന്ന് റസൂൽ g പഠിപ്പിച്ചിട്ടുണ്ട്. നാൽപത് ദിവസത്തിൽ കൂടുതൽ അവ നീക്കം ചെയ്യാതെ വെക്കരുത്.

·> നാൽപത് ദിവസത്തിനുള്ളിൽ തന്നെ അത് വളർന്ന് വൃത്തികേടായാൽ ഉടൻ നീക്കം ചെയ്യാം. ഓരോ വ്യക്തിക്കനുസരിച്ച് നീക്കം ചെയ്യുന്ന സമയം വ്യത്യാസപ്പെടും. എന്നാൽ നാൽപത് ദിവസത്തിൽ കൂടുതൽ അവ നീക്കം ചെയ്യാതിരിക്കരുത്.