അല്‍അഖീദത്തുല്‍ വാസിത്വിയ്യ: ഈ ഗ്രന്ഥം
ഇസ്ലാമിക ലോകത്ത് അറിയപ്പെട്ട ഒരു കൃതിയാണ് ശെയ്ഖുൽ ഇസ്ലാം ഇബ്നു തെയ്മിയ്യയുടെ “അൽ അഖീദത്തുൽ വാസിത്വിയ്യ”. ഇത് രചിക്കാൻ ഇടയാക്കിയ സാഹചര്യം ശെയ്ഖുൽ ഇസ്ലാം ഇബ്നു തെയ്മിയ്യ തന്നെ വിവരിക്കുന്നത് ഇപ്രകാരമാണ്:
“ഈ ഗ്രന്ഥം എഴുതാനുള്ള കാരണം വാസിത്വിലെ ഒരു പ്രവിശ്യയിൽ നിന്ന് അവിടുത്തെ ഖാളിയായ റളിയുദ്ദീൻ അൽവാസിത്വി എന്ന് പറയപ്പെടുന്ന ശെയ്ഖ് എന്റെ അടുക്കലേക്ക് വരികയുണ്ടായി. അദ്ദേഹം ശാഫിഈ മദ്ഹബുകാരനായിരുന്നു. ഹാജിയായികൊണ്ടാണ് അദ്ദേഹം ഞങ്ങളുടെ അരികിൽ
വന്നത്. ദീനീ നിഷ്ഠയും മഹത്വവുമുള്ള വ്യക്തിയായിരുന്നു അദ്ദേഹം. വാസിത്വിലും താർത്താരികൾ ഭരിക്കുന്ന നാടുകളിലും ജനങ്ങളിൽ അജ്ഞതയും അക്രമവും വിളയാടുന്നതും മതവും വിജ്ഞാനവും കാലഹരണപ്പെടുകയും ചെയ്യുന്നതിൽ അദ്ദേഹം ആവലാതിപ്പെട്ടു. അദ്ദേഹത്തിന്നും അദ്ദേഹത്തിന്റെ
കുടുംബത്തിന്നും അവലംബ യോഗ്യമാകുമാറ് അഖീദയിൽ ഒരു രചന നടത്തികൊടുക്കുവാൻ അദ്ദേഹം എന്നോട് ആവശ്യപ്പെട്ടു. അപ്പോൾ അതിൽ നിന്ന് എന്നെ ഒഴിവാക്കിത്തരണം എന്നാവശ്യപ്പെട്ടുകൊണ്ട് അദ്ദേഹത്തോട് ഞാൻ പറഞ്ഞു: “അഖീദയിൽ ധാരാളം ഗ്രന്ഥങ്ങൾ രചിക്കപ്പെട്ടിട്ടുണ്ട്. അഹ്ലുസ്സുന്നയുടെ ഇമാമുമാർ എഴുതിയ ചില അഖീദ ഗ്രന്ഥങ്ങൾ നിങ്ങൾക്ക് സ്വീകരിക്കാവുന്നതാണ്”. എന്നാൽ അദ്ദേഹം എന്നെ ചോദിച്ചലട്ടുകയും ഇപ്രകാരം പറയുകയും ചെയ്തു: “താങ്കൾ എഴുതുന്ന ഒരു അഖീദയല്ലാതെ ഞാൻ താൽപര്യപ്പെടുന്നേ ഇല്ല. അപ്പോൾ ഈ അഖീദ ഗ്രന്ഥം ഞാൻ അസർ നമസ്കരിച്ചിരിക്കവെ അദ്ദേഹത്തിന്ന് എഴുതി നൽകി.
ധാരാളം പണ്ഡിതർ ഈ ഗ്രന്ഥത്തെ പ്രശംസിക്കുകയും ഇതിന്ന് വ്യാഖ്യാനങ്ങൾ രചിക്കുകയും ചെയ്തു. ഇന്നും ഇത് അനുസ്യൂതം തുടരുന്നു.
സഊദി അറേബ്യയിലെ റിയാദിൽ വിദ്യാർഥിയായിരിക്കുന്ന കാലത്താണ് ഉമർ മൗലവി അൽഅഖീദത്തുൽ വാസിത്വിയ്യ വിവർത്തനം ചെയ്തത്. തുടർന്ന് ഈ കൃതിയുടെ പ്രകാശനം ഹിജ്റ വർഷം 1377, റബീഉൽ അവ്വൽ 12നാണ് നിർവഹിക്കപ്പെടുന്നത്. മലബാറിലും കേരളത്തിലെ ഇതര പദേശങ്ങളിലും മുസ്ലിമീങ്ങൾക്കിടയിൽ പ്രചാരത്തിലുണ്ടായിരുന്ന അറബി -മലയാളം ലിപിയിൽ അച്ചടിച്ച് സഊദ് ബ്നു അബ്ദിൽ അസീസ് രാജാവിന്റെ ചിലവിൽ തിരൂരങ്ങാടിയിലെ ആമിറുൽ ഇസ്ലാം ലിത്തോ പ്രസ്സിൽ നിന്നായിരുന്നു ഇതിന്റെ പ്രസാധനം. ഏകദേശം അരനൂറ്റാണ്ട് മുമ്പ് രചിച്ച ഈ കൃതിയിലെ ഭാഷാപയോഗങ്ങൾ വായനയുടെ ഒഴുക്കിനായി എഡിറ്റ് ചെയ്തിട്ടുണ്ട്.
ശെയ്ഖ് അലവി ബിൻ അബ്ദിൽ ഖാദർ സഖാഫ് . യുടെ പരിശോധനയോടെ1433-ൽ പ്രസിദ്ധീകരിച്ച “അൽഅഖീദത്തുൽ വാസിത്വിയ്യ”എന്ന ഗ്രന്ഥമാണ് അറബി മൂലത്തിനായി ഇവിടെ അവലംഭിച്ചിട്ടുള്ളത്. തലക്കെട്ടുകളുടെ നാമകരണം, ശെയ്ഖ് മുഹമ്മദ് ബിൻ സ്വാലിഹ് അൽഉഥൈമീനയുടെ വ്യാഖ്യാനത്തിൽ നിന്നുമാണ് എടുത്തിട്ടുള്ളത്. അടിക്കുറിപ്പുകളും അനുബന്ധവും ആവശ്യാർത്ഥം നൽകിയിട്ടുള്ളത് വിജ്ഞാനദാഹികൾക്ക് ഉപകാരപ്പെടും, തീർച്ച.
ഈ കൃതി ഞങ്ങൾക്ക് നൽകിയ വ്യക്തിക്ക് അല്ലാഹു അനുഗ്രഹം ചൊരിയുമാറാകട്ടെ എന്ന് പ്രാർഥിക്കുന്നു. ശെയ്ഖുൽ ഇസ്ലാം ഇബ്നു തെയ്മിയുടെ ഒരു കൃതി പുസ്തക രൂപത്തിൽ കേരളത്തിൽ ആദ്യമായി പ്രസിദ്ധീകരിച്ച വ്യക്തി ഉമർ മൗലവിതന്നെയായിരിക്കും എന്ന് നമുക്ക് കരുതാം. അദ്ദേഹത്തിന്റെ ഈ രചന ഒരു പുണ്യകർമമായി അല്ലാഹു സ്വീകരിക്കുമാറാകട്ടെ…
ആമീൻ