ഹദീസ് 01

> സൽകർമങ്ങൾ ചെയ്യുന്നവർക്ക് അർഹമായ പ്രതിഫലം അല്ലാഹു നൽകും. ചില കർമങ്ങൾക്ക് പ്രതിഫലംനൽകപ്പെടു ന്നത് പതിൻ മടങ്ങ് ഇരട്ടിയായിട്ടാണ്.

> ആത്മാർത്ഥതക്കനുസരിച്ചാണ് ഓരോ കർമങ്ങളും സ്വീകരിക്കപ്പെടുക. അപ്പോൾ അതനുസരിച്ച് പ്രതിഫലം പരിപൂർണ്ണമായും നൽകപ്പെടും.

·> ഇസ്‌ലാമിലെ വളരെ പ്രധാനപ്പെട്ട മൂന്ന് കാര്യങ്ങൾ ഇതിൽ പരാമർശിക്കപ്പെട്ടിരിക്കുന്നു. അല്ലാഹുവിലുള്ള വിശ്വാസം, നമസ്‌കാരം നിലനിർത്തൽ, റമദ്വാനിലെ നോമ്പ് എന്നിവയാണ് അവ. ഇവ ഭംഗിയായി ചെയ്യുന്നവർക്ക് സ്വർഗ്ഗം നൽകൽ അല്ലാഹു സ്വന്തത്തിന് ബാധ്യതയാക്കിയിട്ടുണ്ട്. 

·> സകാത്ത്, ഹജ്ജ് എന്നീ രണ്ട് കാര്യങ്ങൾ വളരെ പ്രധാനപ്പെട്ടവ തന്നെയാണ്. എന്നാൽ സകാത്ത് എല്ലാവർക്കും ബാധ്യതയില്ല, സകാത്ത് നൽകാൻ മാത്രം ധനം ഉള്ളവരാണ് അതിൽ പെടുക. ഹജ്ജും അത് പോലെയാണ്, ജീവിതത്തിൽ ഒരിക്കൽ ചെയ്യലാണ് ബാധ്യതയായിട്ടുള്ളത്. അത് തന്നെ അതിന് സാധിക്കുന്നവർക്ക് മാത്രം. 

·> മുകളിൽ സൂചിപ്പിച്ച മൂന്ന് കാര്യങ്ങൾ എല്ലാവർക്കും ബാധകമാണ്. അഞ്ച് കാര്യങ്ങളും ഭംഗിയായി നിർവ്വഹിക്കാൻ നമുക്ക് സാധിക്കണം. അപ്പോൾ നാം കൂടുതൽ പദവികൾക്ക് അർഹരാകും. 

·> ഹദീസിൽ പരാമർശിക്കപ്പെട്ട കാര്യങ്ങൾ ചെയ്താൽ സ്വർഗ്ഗം ലഭിക്കുമെന്നാണ് നമ്മുടെ നബി ﷺ പറഞ്ഞത്. ശേഷം സ്വർഗ്ഗത്തിന്റെ ചില വിശേഷണങ്ങളും പറഞ്ഞു തന്നിരിക്കുന്നു. 

·> സ്വർഗ്ഗത്തിൽ നൂറ് പദവികളുണ്ട്. അല്ലാഹുവിന്റെ മാർഗ്ഗത്തിൽ ധർമ്മസമരം ചെയ്യുന്ന/പ്രവർത്തിക്കുന്നവർക്കുള്ളതാണത്.

·> സ്വർഗ്ഗത്തിലെ പദവികൾ വളരെ വിശാലമായതാണ്. അതിന്റെ വലിപ്പം മനസ്സിലാക്കൽ നമുക്ക് എളുപ്പമല്ല. ആകാശ ഭൂമിയോളം വിശാലത ഒരു പദവിക്ക് തന്നെ ഉണ്ട് എന്നാണ് ഹദീസിലുള്ളത്. 

·> ഹദീസിന്റെ തുടക്കത്തിൽ പറയപ്പെട്ട കാര്യങ്ങൾ ചെയ്താൽ സ്വർഗ്ഗത്തിൽ പ്രവേശിക്കാം. എന്നാൽ ഈ പദവികൾ കരസ്ഥമാക്കാൻ കഠിനാദ്ധ്വാനം ചെയ്യേണ്ടതുണ്ട്. 

·> വിശ്വാസമുണ്ട്, നമസ്‌കരിക്കുന്നുണ്ട്, നോമ്പ് നോൽക്കുന്നുണ്ട് എന്നും പറഞ്ഞ് വെറുതെ ഇരിക്കാൻ പറ്റില്ല എന്നർത്ഥം. ധാരാളം സൽകർമങ്ങളുമായി മുന്നേറാൻ സാധിക്കണം.

·> സ്വർഗ്ഗത്തിലെ ഏറ്റവും ഉന്നതമായ സ്ഥാനം ‘ഫിർദൗസ്’ ആണ്. സ്വർഗ്ഗത്തിന്റെ ഏറ്റവും മധ്യത്തിലും ഏറ്റവും ഉന്നതിയിലുമുള്ള സ്ഥാനമാണത്. സ്വർഗ്ഗം ചോദിക്കുമ്പോൾ ആ സ്ഥാനം ലഭിക്കാനാണ് ചോദിക്കേണ്ടത്. അത് ലഭിക്കാൻ മാത്രം പ്രവർത്തനങ്ങൾ ഉണ്ടാക്കാനുള്ള പ്രേരണയാണ് ഹദീസ് നൽകുന്നത്.

ഈ റമദ്വാൻ നമുക്ക് അതിനുള്ള പ്രചോദനമാകട്ടെ. ആമീൻ