തെളിച്ചം കൂടുന്ന നബി ജീവിതം

‘My choice of Muhammad to lead the list of the world’s most influential persons may surprise some readers and may be questioned by others, but he was the only man in history who was supremey successfull on both the religious and secular level…..’

1932 ൽ ന്യൂയോർക്ക് സിറ്റിയിൽ ജനിച്ച മൈക്കൽ എച്ച് ഹാർട്ട് എന്ന ചരിത്രകാരൻ 1978 ൽ പുറത്തിറക്കിയ തന്റെ 

“The 100:A Ranking of the most persons in history” എന്ന  ഗ്രന്ഥത്തിൽ കുറിച്ചിട്ട വരികളാണിവ.

നബി ജീവിതം സമഗ്രമായി പഠിച്ച അദ്ദേഹം, മനുഷ്യ ചരിത്രത്തിൽ ഏറ്റവും സ്വാധീനം ചെലുത്തിയ 100 മനുഷ്യരുടെ റാങ്കിങ്ങിൽ മുഹമ്മദ് നബി (സ) യെ ഒന്നാമതായി എണ്ണിയിരിക്കുന്നു. മതപരവും മതേതരവുമായ വിഷയങ്ങളിൽ പൂർണമായി വിജയിച്ച ചരിത്രത്തിലെ ഒരേ ഒരു വ്യക്തി നബി (സ) യാണെന്ന് അദ്ദേഹം തുറന്നു പറയുന്നു!

നബി ജീവിതം ഇതുപോലെ മുൻധാരണകൾ മാറ്റിവച്ച് പഠിക്കുന്നവർക്കെല്ലാം ആ മഹത് ജീവിതത്തിൽ അത്യത്ഭുങ്ങൾ ദർശിക്കാനാവും. നബി (സ)യെ ശരിയാംവണ്ണം അറിഞ്ഞവരാരും അദ്ദേഹത്തെ നിന്ദിച്ചിട്ടില്ല; ബഹുമാനിച്ചിട്ടേ ഉള്ളൂ. ഇടക്കിടെ നടക്കുന്ന നബിനിന്ദകൾ നബി പഠനത്തിന്റെ ആവശ്യകതയിലേക്കാണ് വിരൽ ചൂണ്ടുന്നത്.

ആർക്കും മാതൃകയാക്കാവുന്ന വിശുദ്ധ ജീവിതമാണ് അദ്ദേഹം നയിച്ചത്.  കോടിക്കണക്കിന് മനുഷ്യരാണ് അദ്ദേഹത്തിന്റെ ജീവിതം പിന്തുടർന്നുകൊണ്ടിരിക്കുന്നത്. ആധുനിക ലോകത്തിനും തിരുനബി (സ) യിൽ നിന്ന് ഏറെ പഠിക്കാനുണ്ട്.

അജ്ഞയാണ് മനുഷ്യനെ അന്ധനാക്കുന്നത്.

അവിവേകമാണ് അവനെ അപകടകാരിയാക്കുന്നത്. വിജ്ഞാനം മാത്രമാണ് മനുഷ്യന് വെളിച്ചം നൽകുക. വിനയമാണ് വിജയത്തിലേക്കെത്തിക്കുക.

 അതിനാൽ , അത്യത്ഭുതങ്ങൾ നിറഞ്ഞ നബി ജീവിതത്തിലൂടെ നമുക്കൊരു  യാത്ര തുടങ്ങാം.

 ആ ജ്ഞാന സാഗരത്തിലെ മുത്തുകൾ നമ്മെ അത്ഭുതപ്പെടുത്താതിരിക്കില്ല. മനുഷ്യരിൽ അതിശ്രേഷ്ഠനായ തിരുനബി (സ) യുടെ ചരിത്രങ്ങൾ രേഖപ്പെടുത്തപ്പെട്ട കടലാസുകളിലെ ഓരേ അക്ഷരങ്ങളിലും പൂർണതയുടെ മഴവില്ലുകൾ നമുക്ക് ദർശിക്കാനാവും.

നബി ജീവിതത്തെ വായിക്കുമ്പോൾ നാം അനുഭവിക്കുക അനിർവചനീയ അനുഭൂതി തന്നെയായിരിക്കും. ശീതളക്കാറ്റിനേക്കാൾ കുളിർമയാണ് നബി ചരിതങ്ങൾ നമുക്ക് നൽകുക.

വിമർശകരെപ്പോലും വിസ്മയിപ്പിച്ച വിചിത്രകൾ എമ്പാടും അതിലുണ്ട്. മനുഷ്യന്റെ

മനസ്സുകളിൽ  മാറ്റത്തിന്റെ പുതു തിരമാലകൾ അത് സൃഷ്ടിച്ചു കൊണ്ടേയിരിക്കും

അതിനാൽ നമുക്ക് പഠിച്ചു തുടങ്ങാം. മാനവർക്ക് മാതൃകയായ ആ മഹാ മനുഷ്യന്റെ മഹിത മാതൃകകൾ നമുക്ക് പഠിക്കാം , പകർത്താം.

പ്രവാചക ജീവിതത്തിന്റെ  ഒരു ആസ്വാദന പഠനത്തിനാണ് റബ്ബിന്റെ തൗഫീകിനാൻ നാം തുടക്കം കുറിക്കുന്നത്.

إن شاء الله.

നബിനിന്ദകരും നബി (സ) യുടെ അനുയായികളും ഒരുപോലെ പഠിക്കേണ്ട പാഠങ്ങൾ

 ” തെളിച്ചം കൂടുന്ന നബി ജീവിതം ” എന്ന പേരിൽ ഒന്നിടവിട്ട ദിനങ്ങളിൽ എഴുതാനാണ് ആഗ്രഹിക്കുന്നത്. വലിയ ദൗത്യമാണ്. റബ്ബിന്റെ സഹായം കൂടിയേതീരൂ. അറിവ്, അവസരം, ആരോഗ്യം എന്നിവക്കുവേണ്ടി

റബ്ബിനോട് തേടുകയാണ്. നിങ്ങളുടെ പ്രാർത്ഥനയുണ്ടാവണം. സ്ഥിരമായി വായിക്കുക.

അഭിപ്രായങ്ങൾ അറിയിക്കുക. മത വ്യത്യാസമില്ലാതെ

എല്ലാമനുഷ്യരിലേക്കും

എത്തിക്കാൻ ശ്രദ്ധിക്കുക.

അബ്ദുൽ മാലിക് സലഫി